पढ्न लाग्ने समय : 2 मिनेट
पूर्वप्रहरी महानिरीक्षक खड्गजीत बरालको ९३ वर्षको उमेरमा बुधबार (जेठ ५ गते) निधन भएको छ । तत्कालीन नवलपरासी जिल्लाको देवचुलीस्थित चुलीबोझामा वि.सं. १९८५ बैशाख ५ मा जन्मनुभएका बराल प्रहरी सेवाबाट अवकाश प्राप्त गरेपछी ६ वर्षसम्म बर्मा, इण्डोनेशिया, र फ्रेन्च ईन्डो-चाइना (लाओस, क्याम्बोडिया, भियतनाम) का लागि नेपाली राजदूत हुनुभएको थियो । बर्माका लागि नेपाली राजदूतबाट निवृत्त भएपछि उहाँ नेपालको सांसदमा मनोनित हुनुभयो र पछि युनाइटेड नेसन्स् ट्रान्जिसनल् अथरिटी इन् क्याम्बोडिया (उन्टाक्-UNTAC) का प्रमूख सम्पर्क अधिकृत हुनुभयो ।
बराल लोकसेवा आयोगबाट नेपालको तत्कालीन सरकारमा प्रहरी महानिरीक्षकको लागि सिफारिस हुने प्रथम स्नातकोत्तर उतीर्ण प्रहरी अधिकृत हुनका साथै ४४ वर्षको कनिष्ठ उमेरमा प्रहरी महानिरीक्षक हुने प्रथम व्यक्ति हुनुहुन्थ्यो । आफ्ना पूर्ववर्ती स्वर्गीय आईजीपी रोम बहादुर थापाका साथै उहाँले ६ वर्षका लागि प्रहरी प्रमुख भई सबैभन्दा बढी समयको लागि प्रहरी प्रमुखको जिम्मेवारी वहन गर्नुभएको थियो । आफ्नो कार्यकालमा प्रहरीमा गाँस (रासन), बास (ब्यारेक) र कपास (पोशाक) को व्यवस्था गरेर प्रहरीको मनोबल उच्च बनाउन सफल हुनुभएका बराललाई नेपाल प्रहरीको इतिहासमा सबैभन्दा दूरदर्शी र प्रभावशाली प्रहरी महानिरीक्षक मानिन्छ ।
बर्माका लागि नेपाली राजदूत रहँदा बर्माका नेपालीहरूलाई बर्मिज नागरिकता प्रदान गर्नका साथै त्यहाँ पशुपतिनाथ मन्दिर निर्माण गर्नुभएको थियो । बरालकै अगुवाइमा बर्मामा 'भानु जयन्ती' मनाउने परम्पराको सुरूवात गरियो। नेपाल हकी सङ्घको संस्थापक अध्यक्ष र नेपाल जुडो सङ्घको अध्यक्ष भई हकी र जुडोलाई नेपालमा आयात गरी दुवैलाई राष्ट्रव्यापी खेलका रूपमा परिचित गराउने श्रेय बराललाई नै जान्छ ।
दिवंगत बरालप्रति हार्दिक श्रद्धाञ्जली ।