जंगबहादुरका केही किस्सा
पढ्न लाग्ने समय : 4 मिनेट
नेपालमा राणाशासनको जग बसालेर १०४ वर्षसम्म पारिवरिक शासनशैलीको आरम्भ गर्ने वीरनरसिंह कुँवर (पछि जंगबहादुर कुँवर, जंगबहादुर राणा) को निधन भएको १ सय ४४ वर्ष भइसकेको छ तथापी उनको चर्चा अहिलेपनि चलिरहन्छ । उनको शासन शैली, क्रुरता, शाैख तथा विभिन्न किस्साहरूका कारण । यहाँ जंगबहादुरका केही किस्साहरू प्रस्तुत गरिएको छः
- वि.संं १८९८ सालको फाल्गुन महिनामा शिकारका लागि महाराजधिराज श्री ५ राजेन्द्र तराई लागेका थिए । शिकार दलले फेला पारेको जंगली हात्ती नियन्त्रणमा लिन राजा राजेन्द्रले खुब इच्छा देखाएतापनि कसैले समात्न सकेनन् । शिकार दलमा रहेका जंगबहादुरले त्यस हात्तीका दुवै खुट्टामा डोरी बाँध्न सफल भए, जस बापतको पुरस्कार श्री ५ राजेन्द्रबाट जंगबहादुरले नेपाली सेनाको कप्तान पद पाए ।
- वि.संं १८९८ सालको चैत्र महिनामा बसन्तपुर दरबारमा मत्त राँगोको पुच्छर पछिल्तिरबाट समाती जंगबहादुरले वशमा लिएका थिए ।
यो पनि पढ्नुहोस् जंग बहादुरले जीवनभर दाँया खुट्टाको जुत्ता बायाँको भन्दा एक नम्बर ठुलो लगाउन पर्यो
- वि.संं १८९९ ताका काठमाण्डाको कुनै एक बस्तीमा आगलागी भएको खबर जंगबहादुरको कानसम्म पुग्यो । उनले उक्त आगलागीमा फसेका आमाछोरीको उद्दार गरे । सोही सालताका मनोहरा नदीमा भीषण बाढी आयो । जंगबहादुरले बाढीमा फसेका २ जना महिलाको चुल्ठोमा समातेर बचाए ।
- एकबखत दहचोक (हाल चन्द्रागिरि नगर) मा चितुवा आतंकले स्थानीयमा हैरानी भएको जंगबहादुरले सुनेछन्, जंगबहादुरले उत्पात मच्चाउने चितुवा छप्काइदिएको खबर नेपाल खाल्डोमा निकैसम्म चर्चा भइरह्यो । यो घटना भएको केही दिनपछि राजाको हात्ती बहुलाएर आफ्नो माहुतेलाई नै मारिदियो । जंगबहादुरले महाराजको अनुमितिमा हात्ती आउने भनिएको बाटोको एउटा घरमा पसेर झ्यालबाट हात्तीको काँधमा हामफाले र हात्तीको घाँटीमा छुरी धसाई नियन्त्रणमा लिन सफल भए ।
- एकपटक युवराज सुरेन्द्र धरहराको बाटो हुँदै कतै सवार हुँदै थिए । जंगबहादुरले यो धरहराबाट फाल हाल्न सक्लान् कि नसक्लान भनि विचार गरि जंगलाई धरहराको टुप्पोबाट हाम फाल्न हुकुम दिए । जंगबहादुरले आफुले हाम फाल्न सक्ने तर सो काम दुई सातापछि मात्र गर्ने बताए । तर दुई सातामा युवराज सुरेन्द्रले उक्त कुरा बिर्सिए ।
-
जंगबहादुर बेलायतमा रहँदाका पनि अनेक किस्सा छन् । एक दिन उनी महारानीसंग बग्गीमा कतै जाँदै रहेछन् । अचानक फुटपाथको भीडबाट एक व्यक्ति फुत्त उफ्रेर आएर महारानीलाई थप्पड हानेर भागेछ । जंगबहादुर फुत्त तरबार कैँचेर त्यसको पछि लाग्न खोज्दा महारानीले ‘यहाँ त्यसरी मान्छे मार्न हुँदैन, प्रहरी छ, पक्राउ गरिहाल्छ’ भनेर रोकिछन् ।
त्यसपछि कोही बेलायती ठूलो मान्छेसँग भेट भयो कि जंगले महारानीलाई थप्पड हान्नेलाई के कारबाही भयो भनेर सोध्थे रे । पछि त्यस व्यक्तिलाई दुई महिना कैद सजाय भयो भनेको सुन्दा जंगबहादुर छक्क परेछन् । त्यही घटनाबाट जंगबहादुरमा ऐन बनाउनु पर्छ भन्ने सोच आयो भन्नेहरू पनि छन् ।
-
जंगबहादुर बेलायत जाने बेला पानी जहाजको प्रयोग गरेका थिए । समुन्द्री डाँकुबाट बच्न उनले तोपहरु जडान गरेका थिए । उनले भ्रमण टोलीमा कट्टर हिन्दूहरुलाई भान्से, पिपलको बिरुवा भएको गमला, ४० वटा पित्तलका गाग्रीहरु, दुहुनो गाई र महिनौं सम्मलाई पुग्ने दाल, चामलपनि साथै लगेका थिए ।
-
बेलायतमा पुगि नेपाली अलग्गै बसी खाना खान्थे । गाई दुहुन पनि अरुले पाउँदैनथे । यो दृश्य देखेर बेलायतीहरु अचम्म मान्थे । ४२ जनाको भ्रमण दलले आफ्नो पोका–पन्तुरा बोकेर बेलायती होटलमा दौरा लगाएका जाँदा बेलायतीहरु रमिता मानेर हेर्थे ।
सन्दर्भ सामाग्री
विभिन्न अनलाइनहरू